RESUMO PARA A VECIÑANZA DE CERVANTES
QUE NOS MOVE
Contribuír ó Desenvolvemento integral de Cervantes co protagonismo inescusable da súa poboación e os recursos do territorio. Partindo da empatía e a proximidade e por medio dun diálogo educativo respectuoso coas distintas sensibilidades chegaremos á elaboración de proxectos viables de transformación das distintas realidades, facendo unha clara discriminación positiva cara os colectivos máis sensibles.
METODOLOXÍA DE TRABALLO
En tempo de predominio de proxectos “de gabinete” “paracaidistas” no rural e vendedorxs de solucións fantásticas, apostamos por incardinarnos na zona respectando e promovendo o protagonismo da veciñanza por medio da implemementación de pequenos proxectos que “a pouquiños” vaian cambiando as realidades.
RECURSOS
Humanos:
Todas as persoas e agrupacións que están a facer cousas a favor de Cervantes en calquera dos seus pobos son sempre moi valoradas, recoñecidas e apoiadas como o principal motor da transformación; entre elas figuran as 17 socias oficiais, 5-8 traballadoras e 23 voluntarias do CDR Ancares.
Materiais:
Todos os do territorio susceptibles de ser utilizados e todos aqueles emanados das exixencias pedagóxicas ou lexislativas.
SINERXÍAS
Coa gran maioría de asociacións e institucións locais e todas aquelas que nos axuden a mellorar
FINANCIAMENTO
Procuramos acceder a financiamento público ligado á presentación e realización de proxectos que tenten responder a problemáticas concretas. Parécenos unha maneira eficaz e intelixente de que os cartos públicos cheguen de xeito adecuado e creativo a territorios con características tan especiais coma a montaña. Anos de experiencia e formación con outros grupos similares doutros territorios de Galicia e España avalan que esta fórmula resulta acaída e rendible. Este sistema posibilita sacar adiante proxectos que doutro xeito non serían viables.
CERVANTES, A NOSA LOCALIZACIÓN E A NOSA RAZÓN DE SER
O Centro para o Desenvolvemento Rural Ancares desenvolve a súa actividade en CERVANTES (Lugo).
O noso motor son as 1210 persoas que viven nun territorio de 276 Km2 agrupadas en 21 parroquias e 139 aldeas . É o concello de Cervantes situado na alta montaña oriental da provincia de Lugo limítrofe con León.
